" و الله لنخرب بيت العمال و نعلمهم الأدب و الراجل فيهم يقل بم بعد كده " فرد العمال بحملة مش هنخاف

ده الشعار اللى رفعته الحكومة و اصحاب الاعمـــــال للقضاء على كل أشكال المقاومة السلميه للعمال للحصول على حقهم و الحفاظ على لقمة العيش و ده طبعا معجبش الحـــــــكومة اللى عاوزه من العمــــال الخنــوع و الخضوع و أن ويرضوا بما يجود به صاحب العمل عليهم ، وعلشان ده يتحقق لابد من اظهار العين الحمرا للعمـــــــــال و تبنى حمله شرسة ضد العمال لفصلهم و نقلهم و تشريدهم و قيادتهم بعد كل تحرك عمالى

فى المقابل كان لابد من رد للعمال على ما يتعرضون له " فكانت حملة مش هنخاف لا للفصل و تشريد العمال " التى ترد عليهم بانكم لن ترهبونا ، لن نخـــــاف من سياستكم ، لن نصمت عن المطالبه بحقنا و حق كل زملائنا و اول خـــطوه لنا هى النضال من اجل عودة العمـــــــــــــــــال المفصولين و المنقولين و الموقوفين عن العمل .

و تم تشكيل الحملة من قيادات عمالية من مواقع و قطاعات عمالية مختلفه ( 35 موقع عمالى ) مشـــــــــــــــــتركا معهم المركز المصرى للحقوق الاقتصادية و الاجتماعية و مجموعة تضــامن و اللجنة التنسيقية للحقـــــــــوق و الحــــــريات النقابية و العمالية و مركز هشام مبارك و اللجنة التحضرية للعمال و مركز الهلالى و حملة ـ مصـــر اهم .

يوم 7 اكتوبر 2009 كانت بداية انطلاق فعليات الحمــــــلة متمثله فى بعثة طرق الابواب الى الصحف و الاحــزاب للتأكيد على ضرورة متابعة اخبـــار العمال و مشاكلهم و ما يتعرضون له من تعسف و اضهاد قد وصل الى حد قطـع العيش الذى اصبح منهج للحكومة و اصحاب الاعمال بعد انتهاء اى اضراب أو اعتصام .

يوم 16 نوفمـــــــبر2009 توجهنا الى الاتحاد لمقابلة حسين مجاور و لكن حسين كان مسافر الســـودان لحضور مبارة مصر و الجزائر فقابلنا عبدالمنعم الغزالى الذى تحدث معنا و كأنه لا يعرف عنا شىء و الكلام الذى يستمع اليه جــــــديد جدا بالنسبة له و طالبنا منه أن يصــــرف أعانة عاجلة من الاتحاد للعمــــــــال وذلك لقرب عيد الاضحى المبارك فوعدنا و اخذ كشف بأسماء العمال على وعد بصرف اعانة عاجلة لهم

يوم الاثنين 7ديسمبر 2009 تم تنظيم وقفة احتجاجية امام اتحاد العمــــــــال أثناء انعقاد الجمعية العمومية للنقابة العامة للعامليين بالنقل البرى.

يوم 26/12/2009 تم عمل مظـــاهرة امام اتحاد العمال اثناء انعقاد الجمعية العمومية للاتحاد و قد تضـــــامن مع الحملة فى هذا اليوم وفد من اعضاء النقابة العامة للعاملين بالضرائب العقارية مشاركين أعضــــــــاء الحملة فى التنديد بسياسة الاتحاد الظالمة للعمال ، وقد هتف العمال ضد الاتحاد و احضـــــــر العمـــــال اوانى طعام فارغة لكى تعبر عن عدم وجود طعام فى بيوتهم و قد استخدموها فى الطرق بها لكى تحدث نوع من الضجيج .

و سوف تقوم الحملة فى القريب العاجل بالتوجة الى مقر منظمة العمـــل الدولية لفضح ممارسات الاتحاد و القوى العاملة ضد العمال و قد تبنت النقابة العامة للعاملين بالضرائب العقارية " المستقلة " مسئولية تقديم مذكرة تفصيلية لما يتعرض له العمـــــال لان المنظمة لا تقبل شكوى او تظلمات الا من خــــــــلال حكومات ومؤسسات و نقابات

و قد شارك اعضاء الحملة فى التضامن مع عمال طنطا للكتان و المشــــاركة مع القوى السياسية فى عمل وقفة تضامنية امام نقابة الصحفيين و امام مجلس الشعب

فالنقابة العامة منا الف تحية و تقدير.

اذا كانت القــــوى العاملة و الأتحاد العـــام لا يقومون بدورهم تجاه العمال فأن هذا لا يعنى أننا سوف نكون لقمة ســـهله لأصحاب الاعمال او الحكومة ، بل سوف نستمر فى المقاومة بكل قوة للدفاع عن حقنا فى العمل و حـــق اولادنا فى حياة كريمة ، لقد تعلمنا فى السنوات الماضية خـــــــــــبرات مريرة من الظلم و الاضهاد و الاستغلال و تعلمنا من يقف معنا و من يقف فى الاتجاة الاخــــــر ، تعلمنا أن حقوقنا لن تعود الينا سوى بأيدينا ، و تعلمنا كيف نكون يد واحــــدة ضد الظلم لأنتزاع حقوقنا ، تعلمنا ذلك فى مصانعنا ، و سنعمل سويا فى الشـــــارع لاستعاده هذه الحقوق و رد الظلم عنا.

نتعهد امام الله اننا لن ننكسر او نموت من الاضهاد او الظلم ، و اننا لن نصمت مادام فينا قلب ينبض

بعد التعرض لضغوط امنية و سياسية فض عمال طنطا للكتان اعتصامهم

فض منذ قليل عمال طنطا للكتان اعتصامهم من شارع حسين حجازى امام مجلس الوزراء الاعتصام الذى استمر لمدة 17 يوم بعد تعرض العمال لضغوط رهيبة مارسها عليهم مسئولى الامن و وزارة القوى العاملة مقابل صرف معاش مبكر للعمال قيمتة 40 الف جنية .
ان ما حدث فى لجنة القوى العاملة بمجلس الشعب و خوف الحكومة من تسريب اسرار عملية البيع و كشف المستور و كشف علاقة المستثمر السعودى ببعض نواب الشعب و كشف عملية الكتف القانونى الذى اذاح به النائب رئيس النقابة من عملية البيع ليكون هو الوسيط و صاحب النصيب الاكبر من العمولة و سمسرة البيع و قرب الافصاح عن عقد البيع الذى قالت الوزيرة انه لا يضمن اى حقوق للعمال ،
و كشف السيد رئيس اتحاد العمال فى الصحف القومية اول امس عن عدم وجود حلول لدى الوزيرة و ان الملف اكبر بكثير من امكانيات الاتحاد او الوزيرة .
و يبقى سؤال سوف يتم تصفية الشركة و خروج العمال ... مين اللى هيدفع قيمة المعاش المبكر ؟

المستثمر السعودى 25الف و الوزارة و اتحاد العمال 15 الف جنية لكل عامل يتقدم للخروج بداية من اول مارس مع صرف مرتبات شهرى يناير و فبراير اليوم فور وصول العامل الى الشركة فى الاتوبيسات التى وفرتها الاجهزة الامنية و الوزارة لنقل العمال الى مقر الشركة فى طنطا.

تحيـــــــــــــا مصــــــــــــــــــــــــــــــــــــــــــــــــــــر

استمرار اعتصام عمال طنطا للكتان هيكشف اسرار الخصخصة و كمان هيكشف الحكومة الالكترونية .. يا ترى هى الكترونية فى أيه ؟

أستمرار اعتصام عمال طنطا للكتان يكشف كل يوم المزيد من الفساد المنتشر فى حكومة الدكتور نظيف .
ان ما يحدث مع وزير الاسكان ما هو الا ترس فى تلك المنظومة ، و نائب القمار و نائب المستثمر السعودى و نائب اكباس الدم الفاسدة و نواب العلاج على نفقة الدولة ، أنها منظومة فساد انتشر فى أرجاء مصرنا الحبيبة و المتهم الرئيسى الذى يلعب كل الادوار عضو من اعضاء الحزب الوطنى .
الا يجعلنا هذا أن نقول لأ و الف لا للحزب الوطنى ، و مازال هناك الكثير الذى ستكشف عنه الايام القادمة حيث لا ينفع معه علاج و لكن مطلوب البتر .
و على الرئيس مبارك أن يستمع الى صوت الشعب و ان يدخل التاريخ من اوسع ابوابه فأنه بيده احاله كل المسئولين الى المحاكمة و نحن نحى خطوة اسناد عملية نهب العلاج على نفقة الدولة الى جهاز الامن القومى لانها لو كانت اسندت الى جهاز أمن الدولة كانت ستصبح فى خبر كان لانها تتعارض مع مصالحهم فى عملية النهب المنظم لهذه الدولة .
هل يتصور عقل ما يدور فى مصر هذه الايام من فساد كيف لنائب الحزب الوطنى أن يحصل على 27مليون جنية علاج على نفقة الدولة خلال 4 شهور و نفس النائب حصل على 277مليون جنية خلال الاربع اعوام الماضية ، لو كانت قيمة هذه الخطابات تصل الى المواطن كان له منا الف تحية و تقدير و لو كان العلاج يتم فى اى مستشفى حكومى او معهد ناصر مثلا كان الموضوع ماشى و لكن تصرف هذه المبالغ فى مستشفيات استثمارية و خاصة فهنا المشكلة و خصوصا أن سيادة النائب يشغل وظيفة و كيل وزارة الصحة ، لن نسبق الاحداث و سوف ننتظر نتيجة التحقيقات التى تجريها اهم الاجهزة الامنية و اكثرها احتراما و عدالا .
نرجع تانى للفساد فى شركة طنطا للكتان التى تم بيعها الى مستثمر سعودى بمبلغ 83 مليون جنية و قد صرح احدى مساعدية بأن ده المبلغ المكتوب فى العقد ولكنه دفع فوق هذا المبلغ 213مليون جنية من تحت التربيزة ... يترى مين ابن المحظوظة اللى خده و مفيش حد عارف عنه حاجة .
تصريحات السعودى بتقول انه مش همه اى حد لا حكومة و لا اى حد لانه عارف انهم مش هيقدرو يعملوا معاه اى حاجة و قد اكد على هذا الكلام حسب قول العمال بان مدير امن الغربية و سيادة المحافظ قال لهم روحوا القاهرة .. حل المشكلة انا مقدرش عليه و الحل هناك ، و الست الوزيرة مش عارفة تحل المشكل لان اطراف اللعبة فى يد غيرها و كمان وزير الاستثما عاوز يرمى من على كتفه حمل هذا الملف مع انه هو المسئول الاول عن الخراب الذى حل على القطاع العام .
فيه كتف قانونى خده رئيس النقابة العامة من عضو مجلس الشعب لابعاده عن عملية البيع وده السر الثانى فى تبنى النقابة العامة للاضراب فى بدايته منذ 9 شهور .
ان الكل يتكاتف من اجل العمل على انهاء الاعتصام بأقصى سرعة لان كل يوم سوف يكشف المستور فى عملية بيع القطاع العام و من الواضح ان الرئيس قد أسند هذا الملف الى نفس الجهه الامنية من اجل كشف ما به من فساد و كمان تعامل الامن مع المعتصمين يتم بشكل حضارى لم نتعود علية منهم فبكل تأكيد دى تعليمات الامن القومى .

النقابات العمالية فى شـــــــــركات المطاحن تستجيب الى اقتراح اعضاء حملة طرق الابواب و تتقدم بطلب لزيادة أجــــــره الطحن

بعد تحقيق بعض شركات المطاحن لعجز فى نتائج الاعمال عن النصف الاول من العام المالى الحالى و فشل ادارات تلك الشركات فى زيادة نصيبها من الاقماح بما لا يقل عن 100طن يوم و ذلك لتعويض بعض تلك الخسائر ، و اصرار الحكومة على سحب ربط المطاحن من الدقيق و توزيعه على مطاحن رجال الاعمال أعضاء الحزن الوطنى و استمرار الحكومة فى مشروع تحرير سعر الدقيق و عدم قدرة المطاحن العامة على المنافسة فى ظل الاهلاك المستمر للمعدات و كذلك عدم قدرة مطاحن القطاع الخاص على طحن كل كميات الدقيق و خصوصا المطاحن المرخص لها بأنتاج الدقيق 82% لان قدرتها الانتاجية و عددها لا يستوعب الدقيق المطلوب لتغطية كل المحافظات .

اقترح اعضاء حملة طرق الابواب بشركة مطاحن جنوب القاهرة على بعض اعضاء النقابات فى شركات المطاحن بتقديم طلب الى النقابة العامة للعاملين بالصناعات الغذائية بزيادة قيمة اجــــرة الطحن الى 100 جنية للطن بدلا من 75 جنية حاليا .

و قد أستجاب النقابيين الى هذا الاقتراح و تعهدوا بأجتماع عاجل مع رئيس النقابة العامة من أجل العمل على تحقيقة فى ظل تلك الظروف التى تمر بها الشركات .

وقد لقى اقتراح اعضاء الحمله الترحيب لانه يعود على الشركات بعائد افضل من زيادة الربط ب 100طن يوم

وقد وضح اعضاء الحمله بان عائد ال100 طن يوم مضروب فى اجره الطحن ال 75ج = 7500ج يوم " ايراد "

أم فى حاله زيادة اجرة الطحن ب 25 جنية و الشركة تطحن مثلا 1000 طن يوم = 25000جنية يوم " ايراد "

و هو ما يعتبر افضل للشركات من زيادة الربط من القمح

أبــو لمعــــــــــه الفشــــــــار بيدور و يلف على أســـــــــــــياده ..... يمكن حــد يعبره

أبو لمعـــه الفشــــار مابينمش الليل و كل يـــوم يعدى عليه بدون حصوله على وعد من أسياده اللى كان شغال لهم مخبر" و كان بيبوس ايديهم ليل و نهار" بينقص فى عمره شهور و الاعمــــــــــــار بيد الله يشوف صاحبه كان بيطنطت فى كل الدنيا و كان برضه بينفذا اوامر أسياده و اتجنن فى اخر أيامه على زملائه من أجل منصب اعلى و لكن القدر لم يمهله حصاد ما زرع او حتى رضا بعض زملاءه عليه بعد مماته ، و لأن ابو لمعه بهذه الطريقة مش هيتمتع بفلوس المعاش " المره هتتجوز اصلها لسه بخيرها " مش كفاية اللى هبره ايام ما كان مستشار سوء للرجل الاول بالشركة .

من فترة طلع اشاعه انه مرشح لمنصب رئيس مجلس ادارة شركة من اكبر شركات قطاع الاعمال العام لا يسند مجلس ادارتها الا لأشخاص تثق فيها القيادة السياسية و يكون على الاقل وزير سابق علشان تعرف تعمل معاه مصلحه ، ومرت الايام و افتكر ان العمال بتنسى فشره و كذبه اللى شغال فيه طوال الوقت ، و المشكله ان العصابه اللى حواليه من حـــــــراميه و مــــــزورين و متاجـــرين بالدين و الطائفية و مرتشـــــين و فاســــــدين ومعدوم الضمير و الحلانجى و صاحب مصلحه و خالى بالك من صاحب المصالحة ، على فكره هما اللى حوالية و كل صفة من دول يمثلها واحد او اثنين على الاكثر ، يعنى و لله الحمد عددهم بسيط بتنفخوا فيه ماشى انفخــــوا مش مشــــــــكله فى نهاية النفخ اكيد هيفرقع و يفسى و اليوم ده اصبح قريب جدا وهو كل ما بيفتكره بيحصله حاله من الجنون .

المفروض ابو لمعه يقدم الى المحكمة او على الاقل يتم ابلاغ النيابة الادارية ، بقول النيابة الادارية عنه فى قضية فساد من خلال حصوله على عمولات من شركات المحمول العام الماضى و على اعضاء اللجنة الاعتراف بالحقيقة بأنهم تعرضوا لضغوط رهيبة منه لانه كان مستشار الرجل الكبير اللى راح فى داهه " بسببه " من اجل الموافقه على عقد الشركة بالمبالغ العبيطه دى و كمان على النيابة مراجعه التليفونات و الخطوط اللى مع كل افراد اسرته و كلها مجانيه من تلك الشركة و شوفوا عددها كام عده و كام خط و حسبى الله نعم الوكيل .

و أنا عاوز أســــأله عن أخبار الكمبيوتر اللى اخذته رشوة من ....... طبعا انت عارف

و كمان الرجل الموجود شــــريف و عارفك و عارف اخبار الملف اللى انت و اللى تبعك فى جهاز التفتيش اللى كل زميله عرفين أنه هو الحرامى اللى سرقة .

المهم هو بيحاول ميخرجش من الخدمة بأى طريقة حتى لو وصل اليه اى عقد بأى قيمة حتى لو 500 جنية فى الشــــهر أهم شرط عنده هو توفير سيارة له ، ناسى الشبشب و الفانله المنتجوه اللبنى و فى الشتاء عليهم سويتر بيج سبحان مغير الاحوال و لكن تغيير الحال يكون من حلال .

أنا بفكره أن أسيادة اللى بيعتمد عليهم عارفين عنه كل حاجة و كمان فيه 3 ملفات أنا ارسلتهم الى الرقابة منذ اكثر من عام و نصف و مفيش عنهم لا حس و لا خبر ، يمكن يجى واحد شريف و يفتح الملف الا أذا مكنش الملف اتحرق أو أتسرق أو رجع تانى ليك ، هما ممكن يساعدوك طوال ما أنت فى الخدمة تقدم لهم ما يطلب منك لكنهم مهما كان فسادهم فأنهم لا يساعدون مصدرهم اذا انتهت مدة خدمتة و ده بيعملوه مع رؤسائهم فى العمل فما بالك انت هيخدموك ليه بعد أن حصلوا على ما كانوا يطلبونه .

انت الان على وشك أن تصبح مثل خـــيل الحكـــــومة اســــــــــــــــــــــتعد لكى يطلـــق عليك الرصاص

مــا أحــــــــلى الرجـــــــوع أليــــــــــه ... فى عصر الحكومة الالكترونية و القرية الذكية

نفس المشهد يتكرر نزل المصريين بالملايين الى الشوراع و سهروا طوال الليل و كانوا رافعين العلم المصـــــرى و " ا لعلم اليمنى "بعد أن روج الاعلام لهذا العلم لأنه يشبه العلم المصـــــرى و لكن بدون النسر ، على العموم اليمن كانت فى يوم من الايام الشقيقة الصغرى لمصر ، لكن لابد ان يعرف أبناء الوطن شـــكل و لون عــلم بلادهم ، لابد لهم ان يميزوه من بين اعلام الدول العربية الشقيقة ، و فى هذه الايام نزل راجل و شباب و نساء و شيوخ مصر رافعين هذه المره " أنبوبة الغا ز " منذ فجر كل يوم فى طوابير يصل بعضها الى اكثر من كيلو متر ، و تغيب العمال و الموظفي عن العمل من اجل الوقوف فى الطابور و الحمد لله ان الشباب فى اجازة مدارس ، مش فارقه لانهم كده كده مفيش حد بيروح المدارس بسبب انفلونزا الخنازير و الوضع لا يفرق كتير بالنسبة للمرأة ، و ذلك فى مشهد لا يقل اثاره عن مشهد طوابير العيش و حدث اليوم جريمة قتل فى امبابه بسبب المنافسة بين ابناء الوطن للحصول على الانبوبة و الحكومة كما هى العادة لا تهتم بنا و لا بمشاكلنا و عوزانا نموت بعض .
انا شخصيا مش عارف اجيب أنبوبة لان أعضاء الحزن الوطنى قد أستغلوا تلك الازمة فى عمل دعاية أنتخابية لمجلسى الشورى و الشعب و هما اللى بيوزعوا الانابيب و كمان بيكسبوا منها يعنى عملنها سبوبة يلموا من الناس 5 جنية و تانى يوم واحد يوصلها
و ياخد 3جنية و يعطوا البون للى عارفين انهم ممكن يصوتوا لصالحهم اما امثالى من القله المندسة اللى بتقول لا لمرشــــــحى الحزن الوطــنى مفيش لنا انابيب ، مش عارف فى انتخابات الرئاسة هيعملوا ايه فينا ، و لكن طظ فى انابيبكوا احنا هنرجع لعصر ستى و امى و هنستعمل وابور الجاز و هو كله منافع فى ليالى الشتاء الباردة .

تغييرات فى قيادات احدى شركات المطاحن

بلغنا أيها المللك السعيد ذو الرأى الرشيد انه لما بلغت خسائر شركة من شركات المطاحن فى النصف الاول من العام المالى الحالى و تجاوزت ال 6 مليون جنية كان لابد من التخلص من ادارة الشركة و كل القائمين على اداراتها و لكن خاب ظن العاملين بالشركة ، وضاع الامل فى تعين مجلس ادارة جديد ليتولى مسؤليات الشركة و يدافع عن حقوق العمال ولكن خوفا من عودة اعضاء المجلس المعزول من ممثلى العاملين و ممثل المساهمين تم التضحية بتعين مجلس ادارة ، كأن تغييرعضو واحد سوف يعدل حال الشركة ، ام عما يتردد من عدم ترشيح اعضاء المجلس القديم لمدة 5 سنوات فهذا كلام باطل لانه حدث بالفعل فى مرة سابقة فى احد شركات المطاحن و هى شركة جنوب القاهرة و تم عزل مجلس ممدوح مباشر و تعين رفيق شلبى مفوض ثم تم تعينة رئيس مجلس ادارة الشركة و كان من ضمن اعضاء المجلس المعزول عادل عبدالظاهر و كامل عبدالوهاب و عند انتخاب مجلس جديد تقدم كل منهم للترشيح ونجح عادل على مقعد العمال و لم يوفق كامل عبدالوهاب و نجح بدلا منه سمير عادل و لم ينتظر اى منهم مدة 5 سنوات لاعادة ترشيح نفسه ، و اذا كان هذا الكلام صحيح فلا يسقط بالتقادم و لابد من محاسبة كل من تستر على ذلك و العمل على الغاء قرارات المجلس لانه صادر من مجلس تشكيله باطل و اعادة كل المبالغ التى صرفت لاعضاء المجلس فى تلك الفترة .
و يقال الأن أنه تم تغيير عضو واحد من الادارة كأنه هو الوحيد المتسبب فيما وصل اليه حال الشركة و تلك الخسارة و تم تصعيد واحد من ابناء الشركة بدلا منه و اختيار رئيس قطاع موقع انتاجى ليكون رئيس قطاع للمطاحن .... هنا ادركت شهرذاد الصباح فسكتت عن الكلام المباح حتى يتم التأكد من صحة المعلومات و سوف نوضحها بعد ان نتحقق من صحتها .

اعتصام العشرات من عمال "أمونسيتو" امام مجلس الشورى

وسط حصار امنى شديد يعتصم منذ الصباح عمال شركة امونسيتو العالمية بعد تخلى وزارة القوى العاملة و اتحاد العمال عنهم و قد تضامن معهم النائب و القيادى العمالى يسرى بيومى عضو مجلس الشعب عن كتلة الاخوان المسلمين و تقوم الان لجنة اعاشة مشكلة من بعض النشطاء العماليين بتوفير بعض مواد الاعاشة و كذلك توفير بطاطين لحماية العمال المعتصمين من برودة الجو .
وقد هتف العمال وقالوا
" يا جمال قول لابوك دول العمال اللى مش هينتخبوك " ــــ " عادل اغا سرق وطار و العمال و العمل بينهار "
مدونة عمال مطاحن مصر تدعوكم للتضامن مع العمال

هل يخرج العدلى و يدخل " محسن حفظى " بعد منحة لقب بــــــــــــك

الصورة دى امام قسم شرطة الوراق بالجيزة و ما أدراك ما هو قسم شرطة الوراق ده حصل فيه بلوى كتير من قتل و تعذيب و كمان فيه مكتب امن الدوله ، و اليافطة فيها تهنئه من الحزب الوطنى الى قيادات الشرطة بمناسبة عيدهم قصدى عيد ابطال مصر الذبن ضحوا بأروحهم ورفضوا الاستسلام للقوات الاحتلال ، من كانوا يسهرون للحفاظ على امن الشعب و كان شعارهم " الشرطة فى خدمة الشعب " ، و لكن من يسهرون لحماية العرش و يعذبون الشعب ، من قاموا بتغير شعارهم الى " الشرطة فى خدمة سيادة القانون " مش عارف سيادة اى قانون ، القانون عاوز بتاع اكياس الدم الملوثة و عاوز بتاع العبارة وعاوز محافظ القاهرة المسئول الاول عن حادث الدويقة و القانون مش عارف مين اللى خد سمسرة و عمولة من بيع القطاع العام و كمان من وزع اراضى الدولة على قريبة و نسايبة ، يوووووه القانون محتار فى ام بلدنا يطبق على الفقراء و على اللى وقع على ايصال امانة و هو مخدش اى امانة و من يتم اتهامة بشاهدة زور من ناس مش خايفة من ربنا ،و لكن بمناسبة الشهادة الزور فيه امل و خصوصا بعد ان تردد كلام من بعض الشهود بأنهم سوف يشهدون بالحقيقة و طالبوا ان يتم تأجيل القضية الى ان يخرج المدعى على المعاش فى يوليو القادم و انا اقول لهم مفيش مشكله لأنه لسه فيه درجة بعد الاستئناف و قبل النقض . الملفت فى التهنئة انها فيه اسم سيد دقلة و ده مرشح الحزب الوطنى الساقط فى الدورة التى على وشك الانتهاء امام مرشح الاخوان اللى معرفش اسمه مع انه نائب الدايرة التى اعيش فيها .... مش مهم . و كمان تم اعادة الالقاب الملغاة ، اعادها اعضاء الوطنى و قاموا بتوزيعها على رجال الشرطة يعنى " باشــــا " من درجة مخبر وانت طالع حتى مساعد مدير الامن و مدير الامن لقب " بــــــــــك " و حبيب العدلى تم تجريدة من اى اللقاب و ده السر فى الموضوع .

عمال هيئة النقل العام وحشين خالص لانهم خلوا رجال امن الدولة ميعيدوش

البلد كلها فرحانه و كل واحد واخد عياله وخرج يفسحهم و فى كل اشارة مرور يلاقى ظابط واقف ومعاه كيس ابتسامات و كمان ورد و شوية حلاوة طحينية عمال يوزع منهم على ابناء الشعب الفرحانين بعيد الشرطة ، ابنى لسانه طويل شوية قال للظابط انتا معك حلاوة طحينية ليه ؟ فرد عليه و قالة علشان هنقبض على ابوك بكرة تجبهالو معك .

الواد نكد على ام الظابط فى عيده ذى ما عمال هيئة النقل كمان حرموا امن الدوله من التمتع بالعيد ، هما التمتع عندهم فى حاجة تانية فى حماية مستقبلهم و تامين مستقبل اولادهم المتمثل فى حماية كرسى العرش و انتقاله من الاب الى الابن هى دى متعتهم الحقيقية .

رجال الامن اللى سهرنين على راحة مستقبلهم و راحة صاحب العرش خافوا احسن أول يوم فى سنتهم الجديدة يضيع فيها حلمهم راحو مسكين قيادات العمال فى الهيئة و هات تهديد و كلام فاضى من اللى هما بيعملوه ، لو حصل اضراب هنرميكوا فى السجون ، هما بيحسبوا ان الناس مش عيشه فى سجون بدون اسوار ونزلوا على بعض السواقيين و كمان الكمسارية و هات تهديد و وعيد .

وكانت النتيجة هى تحديد ميعاد اخر للاضراب

ابوالغيط و المفتش كرومبو

أحمد ابوالغيط محتار بعد ماحط نفسه فى حس بيص و تقمص شخصية المفتش كرومبو و قال انه عارف مين اللى ضرب نارعلى الجندى الشهيد المصرى احمد شعبان لأنه كان معتمد على دحلان يقوله كام اسم و هو يختار واحد او اثنين منهم و لكن دحلان لقى كل اللى عاوز ينتقم منهم فى السجون الاسرائيلية و كمان المصرية فرح صارف نظر و ساب ابوالغيط اللى طول النها ر نازل يسقى الارض و لكن طلعت المياة مالحة اصلها من البحر و سابت على المياة الجوفية و بوظتها و لكن ربنا بيحب اهالى مصر فنزل عليهم شوية مطر لكن لفشل الحكومة الشوية المطر اللى اخونا فى السعودية بيتمنوا يشوفوا شوية زيهم و بيقموا الصلوات لله و بيدعوا ربنا يديهم شوية مطر لانهم عملين حسابهم كويس و عارفين اذاى يحافظوا عليهم مش ذى حكومتنا اللى عايشة فى القاهرة و شرم و الاسكندرية و باقى البلد ملهاش لزوم و بيدعوا ليل نهار ان الناس يتولع فيها بجاز اسود و تخلص من قرفهم و كمان تحقق برنامج السيد الرئيس و تخفض عدد السكان و لكن الحاج خالد مشعل ذنق ابوالغيط فى برنامج هنا القاهرة مع عمرو اديب و طلب منه اسماء من اطلق النار من غيط القصب على الجندى المصرى لانهم فى فلسطين معرفوش مين اللى ضرب نار غير الاسرائيليين و كمان فى نفس وقت قتل الجندى المصرى كان هناك 5 اصابات بين الفلسطنيين مش معقول الفلسطينى هيضخ اخوة .

يعنى دحلان ضحك على ابوالغيط و كمان المفتش كرومبو اقسم بالله انه قاله على قاتل الشهيد المصرى و لكنه مطنش و بيقول ندبس بتوع حماس علشان نرضى امريكا و اسرائيل و نحافظ للريس على الكرسى وكمان نرتاح شوية قبل ما تقوم ثورة و يتغير الحكم ......

اشتباكات في سيناء بسبب الفيضانات بين قوات الامن و المواطنين

اشتبكت قوات الأمن مع عدد من البدو في جنوب سيناء يتهمون الحكومة بعدم منحهم ما يكفي من المساعدات بعد الفيضانات الغزيرة التي أودت بحياة ما لا يقل عن عشرة أشخاص.
وقد أغلق المتظاهرون الطريق الرئيسي لشرم الشيخ ثم أحرقوا إطارات السيارات ورشقوا الشرطة بالحجارة.
وقالوا إن الحكومة المصرية قد قللت من فداحة الأضرار التي لحقت بهم من جراء الفيضانات، تمهيدا لعدم تعويضهم.
وأدت الأمطار أيضا إلى قطع خطوط الاتصالات في شرم الشيخ ودمرت أكثر من عشرين منزلا في قرية في راس سدر بمصر.
ودمرت الفيضانات المفاجئة سدودا في شمالي سيناء، فيما تهدد مياهها مدينة العريش حيث قتل رجل فيها.
وغرقت امرأة في مرفأ الغردقة المصري بعد اجتياح الفيضانات الطريق الرئيسي فيها. وأغلقت خمسة مرافئ مصرية بسبب الأحوال الجوية المفاجئة.
و قد شهدت مصر حوادث خطيرة فى معظم المحافظات بسبب غزارة الأمطار التى ادت بحياة عدد من الأشخاص من بينهم سياح أجانب.

ضبط مدير مطحن بشركة مطاحن القاهرة بعد ان اختلس 85 طنًّا من الدقيق المدعم

كتب- صالح الدمرداش "المصدر هنا"

نجح ضباط الإدارة العامة لمباحث القاهرة في إلقاء القبض على مدير مطحن تابع لشركة مطاحن القاهرة "أحد المطاحن بقطاع الأعمال" لاختلاسه 85 طنًَّا من الدقيق البلدي المدعم، وكانت معلومات قد وردت لضباط إدارة مباحث التموين بالمديرية أكدتها التحريات السرية؛ مفادها وجود اختلاس وتلاعب في أرصدة الدقيق البلدي المدعم بأحد المطاحن التابعة لقطاع الأعمال والكائنة بمدينة السلام.
وعقب تقنين الإجراءات اللازمة، قامت لجنة من ضباط الإدارة ومفتشي التموين بالقاهرة بمداهمة المطحن، وبجرده تبيَّن وجود عجز في أرصدة الدقيق بمقدار 85 طنًّا، وبإجراء التحريات تبيَّن أن المختلس هو المدعو محمد ف. ع (52 سنة) مدير المطحن، وبمواجهته أقر بنسبة العجز دون أن يعلل سببه.
وفي السياق ذاته، شنَّ ضباط إدارة مباحث التموين بالقاهرة حملة تفتيشية موسعة؛ لمواجهة ظاهرة تهريب الدقيق البلدي المدعم، وبيعه في السوق السوداء.
وأسفرت جهود الحملة عن ضبط 4 سائقين بحوزتهم 10 أطنان من الدقيق البلدي المدعم قبل قيامهم بترويجه بالسوق السوداء، وبمواجهتهم بما أسفر عنه الضبط اعترفوا جميعًا بما نسب إليهم، وتحررت عن ذلك المحاضر اللازمة، وأخطرت النيابة العامة لمباشرة التحقيق.

هــــــــــــــام جــــــــــــدا الى عمال مصر و كل فئات المجتمع

الى كل من تصل اليه الرسالة ، وكان أدمن في جروب يبادر بنشرها .

وجزاكم الله خيراً....

هذه الرسالة منقوله من جروب وأنا كمان عايز أعمل خيروتقدروا

تتأكدوا من المعلومات بنفسكم

***********

السلام عليكم و رحمة الله و بركاته

انا جاتلى الماسيدج دى ويا ريت لو تنشروها تاخدوا ثواب ، أرجو منكم المساعدة في العثور على متبرع بالدم من فصيلةAB -أ ب سالب وذلك لوجود ثلاث توائم حديثي الولادة في حاجة ماسة اليهم بمستشفى

عبد القادر فهمي بمدينة نصر

تليفـــــــــــون والــــــد الاطفال0106039716

*****************************

قطـــــره دم = حيـــــــــاة = صدقة جــــــارية

فمن منا سيعد الجواب عندما يسأله الله سبحانه وتعالي ويقول له عبدي لما لم تعدني ؟

عن أبي هريرة رضى الله عنه قال :

قال رسول الله – صلى الله عليه وسلم - : إن الله – عز وجل – يقول : يوم القيامة يا ابن ادم ، مرضت فلم تعدني

قال : يا رب ، وكيف أعودك وأنت رب العالمين ؟

قال : أما علمت إن عبدي فلانا مرض فلم تعده أما علمت انك لو عدته لوجدتني عنده

واليك الحل البسيط الان :

اتصلوا بوالد الاطفال لعل الله ان يتقبل منا و يرفع عنا البلاء

السيول تجتاح قرية أبو الريش قبلي وبحري والحكومة عاجزة

اجتاحت السيول أمس قرية أبو الريش قبلي وبحري مندفعة هادرة تحمل المنازل الطينية الفقيرة وكذلك الأثاث المتهالك الذي تحويه هذه المنازل فقد انهمرت الأمطار بغزارة على أسوان واندفعت السيول من سلاسل جبال البحر الأحمر من الجهة الشرقية للمدينة و أستمر هطولها لمدة تجاوز نصف ساعة وأعادت هذه السيول ذاكرة السيول التي اجتاحت قري أبو الريش في الثمانينات وقد نتج عن هذه السيول وفاة سيدتين إحداهما مسلمة والأخرى مسيحية فالسيول لا تفرق في الديانة .

وهناك أنباء عن حالات وفاة أخري . وقد قمنا بجولة اليوم في قرية أبو الريش قبلي لمعاينة الكارثة والوقوف على حجم الأضرار وقد هالنا ما رأينا منازل مهدمة بالكامل وبيوت غرقت في المياه والأسر معظمها قضت ليلتها في العراء باحثة عن طوق نجاة بحياتها من هذه الكارثة وقضي معظم المنكوبين ليلتهم فى العراء وما زالوا .

فقد شاهدنا أسرة تتناول طعام الغداء في الشارع مفترشين العراء. ولم نشاهد سوي سيارتي كسح مياه تقومان بكسح المياه من الشارع وتركت البيوت لأصحابها الذين حاولوا نزح المياه بالجرادل والأواني علهم يستطيعون إنقاذ ما يمكن إنقاذه .

وقد اتضح عجز الأجهزة الحكومية عن التعامل مع هذه الكارثة فحتي الآن لم تصرف خيمة واحدة لإيواء المنكوبين أو أي مساعدة عاجلة لإغاثة الأهالي .

إننا نحمل الأجهزة الحكومية المعنية بمحافظة أسوان مسئولية هذه الكارثة وهذا العجز الرهيب فلا زالت حتى الآن المياه والكهرباء منقطعة عن هذه المنطقة .

ونطلق نداءنا العاجل لكافة منظمات المجتمع المدني ومنظمات الإغاثة لإغاثة منكوبي السيول بقرية أبو الريش قبلي وبحري وكافة القرى التي أضيرت ولم نعلم عناه شيئا .

أغيثوا الذين يفترشون العراء في الشتاء

مركز هشام مبارك للقانون

قصيدة الشاعر جمال بخيت " مش باقى منى " أغنية المقدمة لفيلم " دكان شحاتة "

مش باقي مني غير شوية ضي ف عينيا أنا هاديهوملك ..... وامشي بصبري ف الملكوت يمكن ف نورهم تلمحي خطوة ..... تفرق معاكي بين الحياة والموت

مش باقي مني غير شوية نبض ف عروقي خُدي .. و عيشى .. وافتحى لى تابوت أفرح بريحة ورد فرعوني .. وربنا ف عونى ...إذا دخلت الجنة ولاّ النار...هاشتاق إلي ضحكتك وقعدتي ف الداروالقهوة متحوجة من طيبة العطار...ف كل يوم الصبح باشرب حليب قبطي ...وف النهار والمسا بامسك ستار الكعبة لو سبتي ...

واثبت إذا هربتي ...أهديكي عمري وحسي وجوارحي ...أهديكي جرحي ...هو اللي باقي ف دنيتي لما خلص فرحي

مش باقي مني غير شوية لحم ف كتافي ...بلاش يتبعتروا ف البحر...بلاش يتحرقوا ف قطر الصعيد...ف العيد... بلاش لكلب الصيد.. تناوليهم ...خدي اللي باقي من الأمل فيهم ...وابني لي من عضمهم في كل حارة مقام ...وزوريني مرة وحيدة... لو كل ألفين عام ...ألم الجراح يتلم

مش باقي مني غير شوية دم ... متلوثين بالهم ...مُرين وفيهم سم ...كانوا زمان شربات والنكتة سكرهم ....شربتهم الخفافيش في قلب أوكارهم

مش باقي مني غير شوية دم... ماأقدرشي أسقيكي.. مواجعهم... وبرضه ما أقدرشي ..أرميكي...وأبيعهم يمكن ف مرة تعوزي تطلبيني شهيد...هاحتاج يوميها الدم ...يمضي علي شهادتى

مش باقي مني غير شوية قوة ف إرادتي ...علي شوية شِعر من خطي... حاسبي عليهم وانتي بتخطى ف صبح الدلال بتعطري شطي..

مش باقي مني غير شوية ضي ف عينيا ...أنا مش عايزهم ...لو كنت يوم ها لمحك... وانتي بتوطي ..في معركة مافيهاش لاطيارات ولاجيش ...وانتي ف طابور العيش ...بتبوسي إيد الزمن ...ينولك لقمة من حقك المشروع

مش باقي مني.. غيرشهقة ف نفس مقطوع..بافتح لها سكة.. ما بين رئة.. وضلوع..ما بين غبار.. ودموع..وأنا تحت حجر «المقطم»...ف الدويقة باموت ...أنا.. والعطش.. والجوع..يئن تحتي التراب وانا صوتي مش مسموع...ياحلمنا الموجوع...من المرور ممنوع...مستني لما يمر...موكب سلاطينك..

مش باقي مني غير شوية رحمة من طينك..علي شوية صبر من دينك..

مش باقي مني غير حبة غُنا تايهين ...ف الضلمة مش لاقين ..حس الفواعلية..ولا صوت مراكبي عَفي فوق المعدية..ولا صوت بناتي العذاري في كل صبحية..والغنوة.. أمنية«ياما نفسي أقابل حبيبي..وانا ع الزراعية»..صوتك وصوتهم غاب..وانا تحت حجر المقطم.. باموت لوحديّا...الليلة راحت عيوني تطل ع البستان..وجناين الرمان..رجعت لي توصف عناد الغل والدخان ...وسحابة سودا تضلل علي الغُنا الغلبان..رجعت لي توصف هبوب الموت ..علي الألوان..رجعت لي توصف.... خيال الذل..ف موائد الرحمن..

مش باقي مني غير شوية كُفر بشروقك ..و انا..منبع الايمان..

مش باقي مني..غير شوية ضي..وعينيا ...مش قادرة تلمحني..في وحدتي محني..خايف أموت م الخوف والضعف يفضحني.....السجن عشش ف قلبي ..وماشي ف شوارعك..نفس اللي باعني وخدعني بالرخيص بايعك...هاشيل حمولي انا ...ولا هاشيل حملك ؟!ماعدت أملك شيء..فيكي.. ولا فيّا ولا قيراط ولا بيت..ولا نسمة صافية تلاغي النيل بحرية..

مش باقي مني غير شوية حب جارحّني... ولا باقي مني غير شوية ضي ف عينيا....

عاش كفاح عمال المحلة ..... عاش كفاح المصريين ... اعتصام عمال المحلة فى ذكرى أنتفاضة الخبز

كل الظروف متشابهة و لكن الان أسوء .
هل هناك علاقة بين اختيار عمال المحلة لهذا اليوم و ذكرى 18 و 19يناير 77 ؟
" الانتفاضة العفوية التى قادها العمال و الطلبه بمشاركة باقى فئات المجتمع - انتفاضة الخبز " التى جاءت بعد اتخاذ عبد المنعم القيسوني – نائب رئيس الوزراء ورئيس المجموعة الاقتصادية – أمام مجلس الشعب مجموعة من القرارات الاقتصادية "الحاسمة والضرورية" التي تهدف إلى خفض العجز في ميزان المدفوعات، وذلك تحت ضغط الصندوق الدولى والبنك الدولي ، ومن أجل توقيع اتفاق معهما .
جاءت القرارات على شكل زيادة في أسعار جميع السلع الضرورية، مما ادى الى زيادة مباشرة في أسعار الخبز والسجائر و البنزين والبوتاجاز والسكر والدقيق الفاخر والذرة والسمسم والحلاوة الطحينية والفاصوليا واللحوم المذبوحة والشاي والأرز والمنسوجات والملبوسات، بنسب تتراوح ما بين 30 % إلى 50 % .
في يناير 1977 انفجرت ابناء الوطن على مدار يومين فى كل المدن الرئيسية في مصر، مسببه ذعرًا و هلع للسلطة ، التى سرعان ما ترجعت عن قراراتها، فقامت بأنزال الجيش إلى المدن لقمع المظاهرات و فرض حظر التجول ، بعد أن عجزت الشرطة فى التصدى للمتظاهرين ، وتم اعتقال المئات من السياسين والآلاف من أبناء الشعب.

فما الذي يمـــــــكن أن يحدث الآن ؟
هل هناك إمكانية لانتفاضة شبيهة ؟
ولماذا لم تحدث على مدى سنوات حكم مبارك الأخيرة التي تجاوزت فيها سياساته مستويات 1977 بمراحل لا تقاس ؟

هل من الممكن أن يتحرك الشعب ضد سلطة دكتاتورية ؟ أم أننا نيام و لا نريد و لا نحب من يحاول أن يحركنا من نومنا و لا نفعل سوى لعن الظروف و الحال الذى نعيشه و نجلس لنضع ايدينا على خدودنا ننتظر من يدافع عن مصالحنا و لا نستمع الى من يصرخ فينا من أجل ان نصحو ، انه لم يبقى أمامنا خيار " و لا بطيخ " ، ان العبيد لا يرضون بما نرضى به .

فالحديث عن انتشار الرشوة والمحسوبية والبلطجة وإرهاب السلطة وامتهان آدميه المواطنين والفساد ومراكز القوى والإعداد لتوريث الحكم وقمع المعارضة والاعتقالات والتعذيب حتى الموت وانتهاك حقوق الإنسان وإلغاء دور الجمعيات والنقابات وتدهور التعليم والبطالة وأمراض المصريين حديث مرعب ومخيف .

أربعة من قيادات عمال غزل المحلة يبداءون إضرابًا تصاعديًا عن الطعام

كتبت: سهام شوادة
أعلن صباح اليوم الاثنين 18 يناير أربعة من العاملين بشركة غزل المحلة الدخول فى إضراب عن الطعام بشكل تصاعدى داخل مبنى إدارة الشركة، وذلك احتجاجا على ممارسات المفوض العام للشركة فؤاد عبد العليم حسان تجاههم وتجاه القيادات العمالية بالشركة .
أكد العمال الأربعة وهم فيصل لقوشة وعبد القادر الديب وعبد الغنى النجار وجمال أبو الإسعاد أن المفوض العام لم يكتف بتخسير الشركة أكثر من 144 مليون جنيه نتيجة سياساته الخاطئة، بل بدأ فى انتهاج سياسة التنكيل بأى عامل يفكر فى الاعتراض على قراراته الخاطئة .. مؤكدين أن إضرابهم عن الطعام سيتم بشكل تصاعدى، حيث بدأه اليوم فيصل لقوشة وسينضم إليه الباقون تباعا.
كانت إدارة الشركة قد أصدرت يوم الخميس الموافق 10/12 قراراً بفصل العامل القيادى مصطفى فودة، وخصم العلاوة من العامل القيادى فيصل لقوشة، فيما يعد تصعيداً خطيراً وانتهاكاً فظاً لحقوق العمل، ومخالفة صريحة لنصوص القانون. حيث يأتى قرار الفصل-الصادر فى حق فودة- على خلفية الأحداث التى كانت الشركة قد شهدتها أوائل شهر ديسمبر الماضى عندما أعلن عمال الشركة اعتزامهم الإضراب يوم الاثنين الموافق 7/12 الماضى للمطالبة بزيادة المكافأة السنوية إلى ما يعادل الأجر الأساسى عن 228 يوماً بدلاً من 145 يوماً، وسرعة إجراء التسويات الوظيفية المتأخرة، والمساواة بين عمال الشركة جميعاً باحتساب بدل طبيعة العمل لهم جميعاً بواقع 150جنيهاً شهرياً، ووقف سياسات التنكيل بقيادات العمال التى بدأ يتبعها المفوض العام للشركة. وكانت إدارة الشركة قد استبقت الموعد المحدد للإضراب بتنظيم حملة واسعة لترهيب العمال تضمنت إحالة فيصل لقوشة-أحد القيادات العمالية-إلي التحقيق بزعم “إدلائه بتصريحات صحفية من شأنها تحريض العمال على الإضراب، والإخلال باستقرار الشركة. كما قامت أجهزة الأمن بتهديد عدد واسع من العمال بالاعتقال حال قيامهم بالإضراب.
ثم قامت الإدارة وعقب الوقفة الاحتجاجية التى شارك فيها أكثر من 500 عامل من عمال الشركة يوم 21 ديسمبر الماضى للمطالبة بعودة زميلهم مصطفى فودة، بإصدار قراراتها بنقل فيصل لقوشة إلى مكتب الشركة بالقاهرة ونقل عبد القادر الديب الى مكتب الشركة بمحافظة الإسكندرية، وحرمان عبد الغنى النجار من الإضافى ثم بعد ذلك وقفه عن العمل لمدة شهرين وحرمان جمال أبو الإسعاد من ساعات العمل الإضافى.
طالب العمال فى مذكرة أرسلوا نسخ منها إلى وزير الاستثمار ورئيس الشركة القابضة بإلغاء القرارات الصادرة ضدهم، أو صرف بدل انتقال للمنقولين وصرف بدل وجبة غذاء يوميا، وصرف بدل مبيت حيث إن المنقولين يصلون لمنازلهم بعد الساعة السابعة مساء، وصرف الأجر غير منقوص وشاملا كافة البدلات التى كانت تصرف قبل قرارات النقل.
وفى سياق متصل أعلنت دار الخدمات النقابية والعمالية عن تضامنها الكامل مع مطالب عمال شركة مصر للغزل والنسيج بالمحلة الكبرى، معربة عن قلقها العميق إزاء الإجراءات التعسفية التى تتخذها إدارة الشركة فى مواجهة عمالها،.
وطالبت الدار بالإلغاء الفورى لكافة القرارات التعسفية الصادرة تجاه القيادات العمالية بالشركة، مناشدة كافة القوى والفاعليات الديمقراطية، ومنظمات المجتمع المدنى، والنشطاء السياسيين ونشطاء حقوق الإنسان من أجل التضامن مع القيادات العمالية المضربة عن الطعام داخل شركة غزل المحلة.

مبارك يبدء دعايته الانتخابية من محافظة كفر الشيخ للأنتخابات الرئاسية

بدء مبارك صباح اليوم دعايتة الانتخابية لفترة رئاسة سادسة اثناء زيارتة لمحافظة كفر الشيخ و اعلن عدم حسم قانون الضرائب العقارية و انه يفكر " مازال يفكر "عن اسلوب متدرج لتطبيقة مش كده وبس لا و كمان مد فترة تقدير قيمة العقارات لمدة 10 سنوات بدل من 5 سنوات ،و وضع معدل التضخم فى الاعتبار عند التقدير و كمان بحث نسبة التدرج لتبدء من 1% .

الريس كدة بيأكد انة لم يطلع على القانون و لم يوقع على اصداره ياريت الاخوة المحامين يشوفوا ايه الحكاية يمكن فيه حد زور توقيعة او وقع مكانه ، الامور ماشية اذاى فى ام البلد دى اى حد فاهم يقولى .

وكمان هو رفض المساس بنسبة ال50% عمال و فلاحين اصلهم جـــــوه عينيه ، كيف سيتعامل وزير الجباية مع كلام مبارك ؟ اذاى ؟

ربنا يستر على فقراء مصر من هذا الوزير الذى لا يمكن ان ينام بدون ان يأخذ بتارة و مفيش قدامه غير فقراء الشعب .

عمال الشركة المصرية للمعدات التليفونية : يا نظيف ... يا نظيف .... مفيش فى بيتنا رغيف

هتف عمال الشركة المصرية للمعدات التليفونية خلال وقفتهم الاحتجاجية اليوم ضد حكومة رجال الاعمال و ضد تشريدهم و بيع اراضى الشركة و عدم وجود طعام فى بيوتهم بسبب سياسات الحكومة تجاه عمال الشركة و تجاه عمال مصر ، وذلك احتجاجا على عدم صرف راتب الشهر الماضى حتى الان .

و من الملفت للنظر اتهام عمال الشركة لاعضاء اللجنة النقابية بانهم يساندون ادارة الشركة على حساب العمال و انهم يباركون عملية بيع اراضى الشركة لتحقيق مصالح لهم بعد اتمام عملية البيع ، و قال العمال انهم يرفضون الخروج على المعاش لان التعويض غير مناسب وقليل و كذلك ضعف قيمة المعاش لانهم جميعا تتراوح اعمارهم ما بين 35 و 50 عام.

و قد قطع العمال طريق الكوريش ، و طالبوا بسرعة صرف رواتبهم و حقوقهم و استمرار عمل الشركة و اعادة هيكله الاجور و رفض عملية خروجهم بالمعاش المبكر و كذلك رفض عملية بيع اراضى الشركة .

هوجــــــو شـــــــافيز فى خطابه امام البرلمان الفنزويلى : رفع الحـــــد الأدنى للأجــــــــــور بنسبة الربع على مرحلتين

رفع الحد الادنى للاجور بنسبة 25% على مرحلتين ، الاولى فى ماس القادم بنسبة 10% و الثانية 15% فى سبتمبر القادم و ذلك لتخفيف اثر الاجراءات التى اتخذتها الحكومة لتعويم سعر عملتها ، هذا ما صرح به الرئيس امام البرلمان .

و قال ان الاجراءات التى اتخذت تعمل على تقوية العملة المحلية فى موجة الدولار ليصل الى مستوى 4,3 مقابل الدولار ولكن عند تعويم العملة انخفضت قيمتها بصورة كبيرة وصلت الى 6,5 بوليفار مقابل الدولار مما حد بالحكومة تحديد سعر ثابت لكل التعاملات الاساسية المرتبطة باستخدام المواطن عند مستوى 2,6 للدولار .

و يتعرض الرئيس الفنزويلى الى حمله شرسة من معارضية بسبب برنامج تفنين استخدام الطاقة الكهربائية التى تقوم على قطع الكهرباء لمدة تتراوح لاكثر من 4 ساعات يوميا بتبادل بين بعض المناطق ، و ذلك بسبب موجة الجفاف التى تضرب فنزويلا و قلة المياة عند سد جورى المغذى الرئيسى للكهرباء .

أعتـــــــــــــــزار

نتقدم الى جميع الزملاء بشركة مطاحن جنوب القاهرة و الجيزة و لجميع زوار مدونة عمال مطاحن مصر بالاعتزار لغيابنا عنكم لمدة تقارب الشهر بدون اي تدوين مع وجود احداث هامه جدا من وجهه نظري كانت تستحق التدوين مثل :-
*** إحتفال موظفي و عمال الضرائب العقارية بالنادي النهري للمهندسين بشارع البحر الاعظم بالجيزة بمناسبة مرور عام على انشاء نقابتهم المستقلة و افتتاح مقر نقابتهم العامة بشارع الملك فيصل .
*** قيام حملة مش هنخاف لا للفصل و تشريد العمال بوقفة احتجاجية امام الاتحاد العام لعمال مصر تزامننا مع انعقاد الجمعية العمومية للاتحاد .
*** استشهاد الجندي المصري احمد شعبان بأيد صهيونية فى نفس يوم الذكرى العاشرة لاستشهاد البطل المصري الشهيد سليمان خاطر بأيد صهيونية ايضا .
*** عقد مؤتمر جماهيري فى مدينة الاسماعيلية "لحملة معا لاطلاق الحريات النقابية" لشرح مقترح قانون الحريات النقابية و استقلالها الذى شارك فى صياغته اكثر من 30 منظمة و حزب سياسى و الكثير من القيادات العمالية .
*** حصولي على حكم من المحكمة العمالية بالجيزة على الغاء قرار ايقافي عن العمل و ما ترتب علية من اثار .
*** تأييد محكمة بولاق الد كرور الحكم الصادر ضدي بالحبس شهرين لصالح المدعى منصور نوار " بتهمة التعدي على موظف عام بالقول اثناء عمله " و بالمناسبة هو ليس موظف عام و النيابة أخطأت فى امر الاحالة لان المدعى حسب نص محكمة النقض يعمل بشركة مساهمة و تخضع للقانون الخاص و تم استئناف الحكم .
*** تأجيل قضيتي ضد رئيس الجمهورية و رئيس الوزراء و وزير التنمية الاقتصادية كل بصفتة لتفعيل المادة 34 من قانون العمل رقم 12لوضع حد ادنى للاجور يتناسب مع الاسعارعلى المستوى القومي لكل عمال مصر الى جلسة 9 فبراير القادم امام مجلس الدولة .
*** حفظ المحامي العام لنيابات جنوب الجيزة للمحضر المحرر ضدي من الشركة " بعد أن قدمت الشركة اكثر من 3 تظلمات على قرارت الحفظ السابقة " بأنى نشرت معلومات غير حقيقية عن الشركة و المضحك فى الاوراق ان القطاع القانوني حاول ان يجعلني السبب فى فشل الادارة و تحقيق الشركة لخسائر بسبب الاشتراك فى مناقصة توريد دقيق 82% لمحافظات الصعيد بدون دراسة حسب ما صرح به رئيس الشركة القابضة للصناعات الغذائية ، و الاوراق المقدمة من رئيسة القطاع القانون تقول انى السبب فى تلك الخسائر هو نشرى " للفساد " و تحاول ان ترفع عن رئيس مجلس الادارة فشله مع أنه تم عزله بسبب ما قمت بنشرة .
*** قيامي بتقديم بلاغ الى سيادة النائب العام و السيد وزير العدل و التفتيش الفنى ضد رئيسة القطاع القانوني بالشركة و رئيس مجلس الادارة لسؤ استخدام السلطة من واقع اوراقهم التي تم تقديمها فى المحضر ، و اتهامى بتوزيع منشورات و تلفيق تهم لم يثبت صحة اى منها مما كان له ابلغ الاثر و الضرر على سمعتى و شرفى .
*** نشر الوضع المالي للشركة خلال ال3 شهور الثانية من العام المالي الحالي بعد تحقيق الشركة لخسارة خلال ال3 شهور الاولى بلغت 2,414 مليون جنية .
*** اخبار حملة طرق الابواب التي نقوم بها من اجل العمل على عودة الربط التمويني الذى تم سرقته من الشركة لصالح اصحاب مطاحن القطاع الخاص .
*** بناء مصر للجدار الفولاذي على حدودنا مع غزة برا و بحرا .
*** قتل سبعة مصريين فى محافظة قنا ليله الاحتفال بمولد السيد المسيح .
*** الفوز الكبير لمنتخب مصر على فريق نيجيريا 3/1 و هزيمة المنتخب الجزائري فى بطولة كاس الامم الافريقية .
*** اجراء انتخابات مكتب الارشاد لجماعة الاخوان المسلمين و مبايعة محمد بديع مرشدا عاما ليصبح الثامن فى تاريخ الجماعة .
*** عودة عمال طنطا للكتان الى الاضراب بعد فصل رئيس اللجنة النقابية بالشركة .
*** فض قوات الامن لأضراب عمال بتروتريد المفصولين بالقوة من امام وزارة البترول .

*** محاولة امريكا جعل اليمن المحطة المقبلة للاحتلال بنفس منطق العراق و افغانستان "ضرب تنظيم القاعدة ".
*** وهناك الكثير من الموضوعات التي كان يجب تدوينها و لكن بسبب ظروف خاصة بي و اهمها اصابتي بمرض اقعدني طـــريح الفراش اكثر من 0 2 يوم ، و لكنى لم اترك اي مناسبة والا شاركت فيها و لكن محتملا على نفسي ، اكرر اسفى و تقبلوا اعتزاري .